ភ្នំពេញ៖ មន្ត្រីនៃនាយកដ្ឋានបណ្ដុះបណ្ដាលនៃអតីតគណបក្សសង្គ្រោះជាតិ និងជាអគ្គលេខាធិការអង្គការសហព័ន្ធនិស្សិតបញ្ញវន្តកម្ពុជា លោក គៀន ពន្លក បានចេញវីដេអូទទួលស្គាល់កំហុសរបស់ខ្លួនដែលធ្លាប់បានធ្វើការរិះគន់ និងវាយប្រហារទៅលើការដឹកនាំរបស់រាជរដ្ឋាភិបាល និងសុំការអភ័យទោសចំពោះសម្ដេចតេជោ ហ៊ុន សែន ដោយសារតែកន្លងមកលោកចាញ់បោកគណបក្សប្រឆាំង ជាពិសេសការញុះញង់ពីសំណាក់បរទេស។

លោកបានប្រកាសសុំចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីចូលរួមការអភិវឌ្ឍន៍ប្រទេសជាតិ និងការពារសុខសន្តិភាព និងមិនឱ្យបរទេសជ្រៀតជ្រែកចូលកិច្ចការផ្ទៃក្នុងរបស់កម្ពុជាបានតទៅទៀតទេុំ

តាមរយៈសារក្នុងបណ្តាញសង្គមតេឡេក្រាមរបស់សម្តេចតេជោ ហ៊ុន សែន នៅយប់ថ្ងៃទី១ ខែឧសភា ឆ្នាំ២០២៣នេះ បានឱ្យដឹងថា៖ «ក្នុងនាមគណបក្សប្រជាជនកម្ពុជា ខ្ញុំសូមស្វាគមន៍យ៉ាងកក់ក្តៅចំពោះលោក គៀន ពន្លក។ ដោយសារលោក គៀន ពន្លក កំពុងរស់នៅ និងធ្វើការនៅខេត្តតាកែវ សូមប្រគល់ជូនគណៈកម្មាធិការបក្សខេត្តតាកែវ រៀបចំបែបបទបញ្ចូលបក្សជូន លោក គៀន ពន្លក ស្របតាមនិតិវិធីរបស់គណបក្សប្រជាជនកម្ពុជា»៕